Пичи Чеберайёс но Батыръёс
31 коньывуонэ Якшурысь нылпи садын нырысьсэ ортчиз Ёрос нылпи фестиваль «Пичи Чеберайёс но Батыръёс». Отчы пыриськизы Якшурысь, Сюровайысь, Мукшиысь, Пушкариысь нылпи садъёсысь, Якшур-Бодьяысь одӥгетӥ номеро нылпи садысь но Кекоранысь шор ёзо школалэн нылпи садэз. Радъямын вал пӧртэм ӵошатсконъёс:«Мынам нимы», «Визь сынан», «Кибашлыос», «Пӧраськом удмурт сиён», «Шӧртчиос», «Изь, изь, нуные», «Эктыса лэзём али».
Вань нылъёслы таӵе нимъёс сётӥськизы: Якшурысь Широбокова Софья луиз «Мусокай», Бодьяысь Вахрушева Альбина – «Визьнодӥ», Мукшиысь Широбокова Аделина- Дыдыкай, Пушкариысь Агеева Арина – Устокай, нош «Удмурт Чеберай» луиз Загребина Снежана (Сюровай нылпи садысь). «Удмурт батыр» ним басьтӥз Кекоранысь Байкузин Максим, «Усточи Батыр»- Алексеев Артем (Якшурысь нылпи сад), «Визьлюк Батыр» – Федотов Егор (нырысетӥ номеро нылпи садысь), «Кибашлы Батыр» – Вахрушев Станислав (Мукши нылпи садысь), «Шӧртчи батыр» – Широбоков Илья (Пушкари нылпи садысь). Пиналъёслы кузьмамын мунёос но шудон машинаос, кудъёсыз басьтэмын ужбергатӥсьёслэн юрттэменызы. Нимысьтыз тау вераськом Алексей Гырдымовлы, Андрей Виноградовлы («Удмуртская компания»), Татьяна Емшановалы (Россельхоз банклэн кивалтӥсез), Зоя Васильевалы, Сергей Вахрушевлы но Екатерина Широбоковалы. Та ужрадлэн ортчемез сярысь шумпотонзэ вераз «Якшур» муниципал кылдытэтлэн тӧроез Людмила Кузнецова.
18-19 шуркынмонэ Чебераез но Батырез зечкылалозы Ижкарын «Калыкъёслэн эшъяськон юртаз».
Фестиваль йылпумъяськем бере, радъямын «котырес ӝӧк» сьӧрын вераськон, кудӥз сӥземын вал «Анай кыл анай йӧлын ӵош» темалы. Вераськонэ пыриськизы лыктэм куноос: Антонина Комарова, Удмурт Элькунысь дышетон удысысь йӧскалык ужпумъёсты эскеронъя институтысь ӧнерчи, Ольга Аркашева, Ижкарысь удмурт воспитательёслэн «Зарни бугор» клублэн кивалтӥсез, Лия Малых, «Удмурт дунне» газетысь корреспондент, Ашальчи Оки премилэн лауреатэз. Озьы ик та уже пыриськизы Григорий Вахрушев, Якшур-Бодья ёрос Администрациысь калыкез дышетонъя Управленилэн кивалтӥсезлэн воштӥсез, Вера Вахрушева, ёрос «Удмурт Кенешлэн» кивалтӥсез, Зилина Платонова, калыкез дышетонъя Управлениысь ӧнерчи, нылпи садъёслэн кивалтӥсьёссы, воспитательёс.
