«Гурт адями» конкурсмы йылпумъяськиз. Ми дась вераны вормисьёсты!

Йылпумъяёс лэсьтэмын “ВКонтакте”, Одноклассники” вотэс бамъёсысь но сайтысь кураосты учкыса, алдаса люкам кураосты куштыса.

Туэ вожвылъяськонмес Интернетын гинэ радъямы, шумпотымон, ас пал адямиоссылы куара люканы юрттӥськизы быдэс ёросэн, дурбасьтыны курыса ивортонъёс потазы ёрос администрациослэн, ёрос газетъёслэн вотэс бамъёсазы.Озьыен, вожвылъяськонэ пыриськем муртъёсты, гуртазы гинэ ӧвӧл, быдэс ёросын, Удмуртиын гажало. Конкурсэ ӵектэм муртъёс пӧлы юнме шорысь шедемъёс ӧвӧл – ваньзы устоесь, синмаськымонэсь, зэмосэсь, данъяськымонэсь!

Туэ вожвылъяськон 5 номинацияя ортчиз, отчы ӵектэмын вал 26 адӟем карымон адямиос но 4 гуртъёс.

«Устоез кивалтӥсь» луиз Пичи Пурга ёросысь “Молния” хозяйствоен кивалтӥсь Владимир Селивестров.

Та номинациын нюръяськизы Вавож, Пичи Пурга, Шаркан ёросысь 4 муртъёс — муниципал кылдытэтъёслэн йыръёссы но хозяйствоен кивалтӥсь. Гуртоослэн верамысьтызы шӧдӥськиз, кивалтӥсьёс косъяськыса гинэ уг уло: асьсэ уженызы, мылкыдынызы калыксэс пӧртэм ужъёсты быдэстонэ ӝуто, калыкен артэ тыршо.
Куара сётонлэн нырысетӥ нуналысеныз ик азьмынӥсьёс шараяськизы — Вавож ёросысь Гурезь-Пудга поселенилэн кивалтӥсез Дмитрий Медведев но Пичи Пурга ёросысь «Молния» хозяйстволэн кивалтӥсез Владимир Селивестров. Берпуметӥ нуналозь валамон ӧй вал, кин вормоз. “ВКонтакте”, “Одноклассники” вотэс бамъёсты, сайтэз лыдэ басьтыса, ог 200 куаралы азьпалто вал вавожъёс, но соослэсь пӧечи куараоссэс шедьтӥм, соин ик вормон сётӥськом пургаослы.

“Ӟеч сюлэм” луиз – Вавож ёросысь Ӟамбайгуртысь Нина Капеева.

Татын тужгес трос адями, 11 мурт, нюръяськиз. Огъёсыз керттэм носки-пӧзьёссэс ёрмись семьяос пӧлын люкыло, мукетъёсыз черк пуктыны юрттӥсько, куинетӥосыз коркаязы пукон сэрег усьто. Таяз номинациын, 1 сюрс 654 куара люкаса, азьпала потӥз Вавож ёросысь Ӟамбайгуртысь Нина Капеева. Ог 130 куаралы бере кылиз Пичи Пурга ёросысь Олег Дабыров. Нимысьтыз пусъеммы потэ Эгра ёросысь Вера Перевощиковаез: пулы басьтэм юртэ соос кузпалыныз усьтӥзы пукон корка. Нош Пичи Пурга ёросысь Уромысь Александр Храмов пиосыныз хоккеен шудон коробкаез чакласа, утялтыса возё, гуртооссэс спортэн эшъяськыто. Тӥледын матэгес тодматскысалмы на, озьыен, пумиськытозь.

“Выжыоссэ утись” луиз Алнаш ёросысь Шадрасак-Кибья гуртысь Нина Тарасова.

Анай кылмес, культурамес, шаермылэсь историзэ утён понна сюлмаськись 7 муртъёс та номинациын вожвылъяськизы: кин ке вашкала арбериос люка, мукетыз гуртэз но калыкез сярысь книга поттэ. Таяз люкетын, 2 сюрс 429 куара, люкаса, вормиз Алнаш ёросысь Шадрасак-Кибья гуртысь дышетӥсь Нина Тарасова. Солэсь кӧня ке гинэ куаралы бере кылиз Якшур-Бӧдья ёросысь Татьяна Колхир. Нимысьтыз пусйысалмы на Ува ёросысь Сям-Можгалась Капачинскихъёсты, Шаркан ёросысь Порозысь Иван Кондратьевез, Грак ёросысь Нина Пономарёваез, Кез ёросысь Александр Ивановез. Бадӟым тау, калыкты понна собыдӟа уж нуиськоды шуыса. Оскиськом, тӥледын пумиськыломы, тӥ сярысь гожъяломы на.

«Кивоштӥсь» номинациын вормиз Вавож ёросысь Ӟамбайгуртысь инженер-механик Алексей Орехов.

Татчы 3 мурт гинэ ӵектэмын вал ке но, нюръяськон туж пӧсь пӧрмиз. Шӧдӥськиз, егитъёслэн Интернетын эшъёссы-дурбасьтӥсьёссы тросгес шуыса. Гуртъёслэн ӵуказе нуналзы егитъёс киын, шумпотоно, лыдӟисьёсмы пӧлын гурт ужез данъясь, гуртэз ӝутӥсьёсмы вань шуыса. Куспазы зол нюръяськизы Вавож но Алнаш ёросъёсысь егитъёс. Но кыкезлэн но пӧечи куараоссы шараяськизы. Алдаса люкам куараосты куштыса, вормон сётӥськом Вавож ёросысь Ӟамбайгуртысь инженер-механиклы Алексей Ореховлы.

“Устоез гурт” луиз Балезино ёросысь Алыжгурт.

«Устоез гурт» луон понна нюръяськизы Балезино ёросысь Алыжгурт, Дэбес ёросысь Тыловай, Глазов ёросысь Коротай, Шаркан ёросысь Быгы. Вань та гуртъёсын калык эшъяськыса улэ, вань ужъёссэс валче-уртче лэсьтыны ӝутӥське. 6 куаралы гинэ Балезино ёросысь алыжгуртъёсты азьлпалтӥзы Дэбес ёросысь тыловайёс. Но дэбесъёслэн пӧечи кураоссы шараяськизы, соин ик вормон сётӥськом алжыгуртъёслы. Татын ог 50 гинэ улӥсез, но соос быгатӥзы, ёросысьтызы гинэ ӧвӧл, быдэс элькунысь калыкез куара сётонэ огазеяны. Алыжгуртын трос пенсионеръёс уло, озьы ке но ваньзы сямен Интернетэн эшъясько. Нош кинлэн ӧвӧл, юромо Дядьпи поселение ветлӥзы.

Вормисьёсты данъялом Эгра ёросысь Мувырын пӧсьтолэзе ортчоно Улӟытэм гуртъёслэн фестивалязы. Озьы ик отчы ӧтиськом «Гурт адями» вожвылъяськонэ вань пыриськемъёсты. Вань «гурт адямиослы», дурбасьтӥсьёслы бадӟым тау шуиськом вожвылъяськонэ мыло-кыдо пыриськемды понна.

#ГуртАдями2020#УстоезКивалтӥсь#ӞечСюлэм#ВыжыоссэУтись#Кивоштӥсь#УстоезГурт

https://udmdunne.ru/2021/04/гурт-адями-конкурсмылэн-к..