День Удмуртского языка.

27 ноября в культурно-туристическом центре “Туклячиос” деревни Якшур прошло мероприятие, посвященное Дню удмуртского языка.
Туннэ, 27-тӥ шуркынмонэ Якшур-Бӧдья ёросысь Якшур гуртысь лулчеберетъя но туризмъя «Туклячиос» центрын Удмурт кыллэсь дунневыл нуналзэ «Мон вераськисько удмурт кылын» ужрадэн пусйизы.

Жытэ калык 18 часлы ик оз ке но люкаськы, калленэн вуизы пиналъёсын анайёс но, “Купанча” ансамбле ветлись апаёс но, дышетскисьёс но. Калык люкаськон куспын Удмурт кун университетысь магистрант Анастасия Загребина удмурт кыллэн пайдалыкез сярысь вераськиз но «Анай» фильмлэн авторъёсыз но пыриськисьёсыз сярысь ивортиз. Киноез ваньзы учкемзы бере, фильм сярысь малпанъёссэс веразы Вера Загребина но Ирина Широбокова, “Туклячиос” юртын ужасьёс. Гимназиысь удмурт кылъя но литературая дышетӥсь Любовь Широбокова но ёросысь “Удмурт Кенеш” огазеяськонлэн йырыз Вера Вахрушева но мылкыдзэс оз ватэ, пусйизы кинолэсь мур малпанзэ, сюжетлэсь умойтэм пумыз сярысь верась куд-ог тодметъёссэ, адзизы анайлэсь вашкала дыръёсысен пычам сямъёсты утемзэ.
Со сяна, Удмурт кыллэсь нуналзэ пусйыны люкаськемъёс понна библиотекарь Ирина Широбокова «Мар? Кытын? Ку?» визьбурлыко шудон ортчытиз. Тунсыко юанъёслы ваньзы вожвылъяськыса ик шонер веранъёс утчазы. Чошатсконэз сак дунъясь Екатерина Рустамова, культурая центрлэн кивалтисез, паймысагес ик, но шумпотыса ивортиз, командаос быдэн одиг кадь баллъёс люказы шуыса. Ваньзэсты ушъяз но “Мон вераськисько удмурт кылын” пусъёс кузьмаз.
Бадзым тау якшуръёслы сыче тунсыко жыт ортчытэмзы понна но удмурт кылмес азинтон бордын ужамзы понна. Якшурын Удмурт кыллэн дунневыл нуналэз пайдаё ортчиз.